लामो समयदेखि नेपाली समुदायभित्र विवाद र विभाजनको कारण बन्दै आएको नेपाल डे परेड सम्बन्धी विषयमा अन्ततः ऐतिहासिक सहमति कायम भएको छ। यस सहमतिलाई नेपाली समाजका लागि एक महत्वपूर्ण उपलब्धि र सकारात्मक सुरुवातका रूपमा हेरिएको छ।
विगत केही वर्षदेखि विभिन्न समूहबीच असहमति र मतभेदका कारण नेपाल डे परेडले अपेक्षित एकता प्रदर्शन गर्न सकेको थिएन। तर हिजो सम्पन्न सहमतिले ती सबै मतभेद अन्त्य गर्दै नेपाली समुदायलाई एकताबद्ध बनाउने दिशामा महत्वपूर्ण कदम चालेको छ।
यस ऐतिहासिक मिलनको सफलताका पछाडि थुप्रै व्यक्तित्वहरूको निस्वार्थ र निरन्तर प्रयास रहेको छ। विशेषगरी नेपाल आदिवासी जनजाति महासंघका संघीय परिषद सदस्य संस्थाका अध्यक्षहरू, महासचिवहरू, एनआरएनका प्रतिनिधिहरू तथा भुर्तेल ल फर्मलगायतका व्यक्तित्वहरूको योगदान उल्लेखनीय रहेको बताइएको छ। उनीहरूको सक्रिय भूमिका र समर्पणले सहमति सम्भव भएको हो।
समुदायका अगुवाहरूले यसलाई नेपाली समाजमा आएको सकारात्मक परिवर्तनको संकेतका रूपमा व्याख्या गरेका छन्। अब विगतका तिता अनुभवलाई पाठका रूपमा ग्रहण गर्दै आपसी एकता, सहकार्य र सम्मानका साथ अघि बढ्नुपर्ने आवश्यकता औंल्याइएको छ।
नेपाली पहिचान, संस्कृति र अस्तित्वलाई सुदृढ बनाउँदै आगामी पुस्ताका लागि गर्व गर्नलायक समाज निर्माण गर्नु सबैको साझा जिम्मेवारी भएको पनि उनीहरूले बताएका छन्।
आगामी मे १७ मा आयोजना हुने नेपाल डे परेडमा सबै नेपालीहरूलाई खुला रूपमा सहभागी भई एकताको सन्देश विश्वभर फैलाउन आह्वान गरिएको छ। यस परेडमार्फत भाईचारा, भातृत्व र आपसी सम्मानको भावनालाई अझ सशक्त बनाउने विश्वास लिइएको छ।
नेपाली समुदायले अब एक स्वरमा अघि बढ्दै विश्वमाझ एकताको उदाहरण प्रस्तुत गर्ने अपेक्षा गरिएको छ।