बझाङ । नेपाली कांग्रेस बझाङले आगामी प्रतिनिधिसभा सदस्य निर्वाचनका लागि जेन–जी पुस्ताको सशक्त प्रतिनिधित्व गर्ने युवा र योग्य नेता दिपेन्द्र जोशीलाई सर्वसम्मत रूपमा सिफारिस गरेको छ। विद्यार्थी राजनीति, संगठनात्मक नेतृत्व र सामाजिक सक्रियतामा निरन्तर योगदान दिँदै आएका जोशी जिल्लाभरि सम्मानित र उदाउदो राजनीतिक व्यक्तित्वको रूपमा स्थापित छन्।
जोशी राजधानीको प्रतिष्ठित त्रिचन्द्र क्याम्पसमा नेपाल विद्यार्थी संघका पूर्व सचिव रहिसकेका, दक्ष र अनुभवी विद्यार्थी नेताका रूपमा परिचित छन्। विद्यार्थी हक–हितका मुद्दा, संगठन विस्तार, नीति संवाद र पार्टीगत अभियानमा दीर्घ समय सक्रिय भूमिका निभाइसकेका जोशीले कांग्रेसभित्र स्थायित्वसहितको प्रभावशाली स्थान बनाएका छन्।
शैक्षिक रूपमा पनि जोशी उत्तिकै प्रतिबद्ध र सक्षम मानिन्छन्। हाल उनी वातावरण विज्ञानमा पीएचडी (विध्यावारिधी) अध्ययनरत छन्। अध्ययन, शोधकार्य र व्यवहारिक राजनीतिक अभ्यासलाई सँगसँगै अघि बढाइरहेका उनले ज्ञान र नेतृत्वको संयोजनलाई आफ्नो पहिचान बनाएका छन्।
त्यसैगरी, जोशी नेपाल वातावरण समाजका केन्द्रीय सदस्यको रूपमा वातावरण संरक्षण, जलवायु सचेतना र दिगो विकासका मुद्दामा सक्रिय आवाज बनिरहेका छन्। युवाहरूमाझ लोकप्रिय तथा प्रभावकारी मानिने उनी युवा संस्था–सञ्जालका केन्द्रीय उपाध्यक्ष समेत हुन्, जसले उनी युवा नीतिप्रति कति समर्पित छन् भन्ने देखाउँछ।
राजनीतिक संरचनामा औपचारिक भूमिकाको हिसाबले, उनी नेपाली कांग्रेसका प्रदेश महाधिवेशन प्रतिनिधि रहेका छन्। स्थानीय जनताको अपेक्षा, जेन–जी पुस्ताको आकांक्षा र पार्टीभित्रको पुस्तान्तरणलाई जोड्ने पुलका रूपमा उनी बझाङसहित प्रदेशभरि चर्चित युवा नेताका रूपमा उभिएका छन्।
२०७९ सालमा पनि जोशी बझाङबाट समानुपातिक प्रतिनिधिसभा सदस्यका लागि सिफारिस भइसकेका थिए, जसले पार्टीभित्रको विश्वास र उनीप्रतिको निर्भरता स्पष्ट देखाउँछ।
कांग्रेसका जिल्ला नेताहरूका अनुसार, “दिपेन्द्र जोशीको सिफारिस केवल एक व्यक्तिको नाम होइन, युवालाई नेतृत्वमा अगाडि सार्ने कांग्रेसको दीर्घकालीन रणनीति र प्रतिबद्धताको प्रत्यक्ष प्रमाण हो।”
जोशीको संयमित स्वभाव, संगठनात्मक दक्षता, अध्ययन–अनुभवको गहिराइ र युवाको मनोविज्ञान बुझ्ने शैलीले उनलाई बझाङको मात्र होइन, समग्र प्रदेशको उदाउँदो, जिम्मेवार र विश्वासयोग्य युवा नेतृत्वको प्रतीक बनाएको छ।