प्रहरीले नेकपा एमालेका नेता महेश बस्नेतलाई पक्राउ गर्ने अनुमति दिन अदालतसँग माग गरेको छ ।
काठमाडौं जिल्ला अदालत पुगेर प्रहरीले बस्नेतविरुद्ध पक्राउ पुर्जी मागेको हो । बस्नेतविरुद्ध साइबर अपराध सम्बन्धमा जाहेरी परेपछि प्रहरी पक्राउ पुर्जी माग्दै अदालत गएको थियो ।
तर, अदालतले तत्काल पक्राउ पुर्जी दिएको छैन । काठमाडौं जिल्ला अदालत स्रोतका अनुसार अदालतले थप प्रमाण पेस गर्न आदेश गरेको छ ।
अब प्रहरीले बस्नेतलाई पक्राउको अनुमति लिनका लागि थप प्रमाण लिएर आउनुपर्ने अदालत स्रोत बताउँछ ।
स्रोतका अनुसार विद्युतीय कारोबार कसुर ऐन अन्तर्गत प्रहरीले पक्राउ अनुमति मागेकोमा अदालतले थप प्रमाण पेस गर्न भनेको हो ।
यता बस्नेतले भने आफूविरुद्ध अदालतले पक्राउ पुर्जी जारी गर्न अस्वीकार गरेको उल्लेख गरेका छन् । सामाजिक सञ्जाल फेसबुकमा एक टिप्पणी गर्दै उनले लेखेका छन्, ‘अदालतप्रति हार्दिक सम्मान र आभार व्यक्त गर्दछु ।’
वर्तमान सरकारले आफूले राष्ट्रियता र जनहितको बारेमा बोलेका बोली बन्द गर्न चाहेको बस्नेतको आरोप छ ।